ਖਿੜਕੀ ਦੇ ਅੰਦਰ ਤੇ ਬਾਹਰ

ਬਰਸਾਤ ਦਾ ਮੌਸਮ
ਸਫ਼ਰ ਵਿਚ ਉਹ ਮੇਰੇ ਨਾਲ ਨਹੀਂ
ਨਾਲ ਦੀ ਸੀਟ ਖਾਲੀ ਹੈ
ਜਿਸ ਦੀ ਬੜੀ ਸਹੂਲਤ ਹੈ ਮੈਨੂੰ
ਮੇਜ਼ ਵਾਂਗ
ਇਸ ਤੇ ਅਖਬਾਰ ਕਿਤਾਬ ਜਾਂ ਪੈਨ ਰੱਖ ਸਕਦਾਂ
ਪਾਣੀ ਦੀ ਬੋਤਲ ਮੋਬਾਈਲ ਐਨਕ
ਤੇ ਹੋਰ ਨਿਕਸੁਕ ਰੱਖ ਸਕਦਾਂ

ਪਰ ਨਿਕਸੁਕ
ਉਸ ਦੀ ਗੈਰ ਮਜੂਦਗੀ ਨਹੀਂ ਪੂਰਦਾ
ਜਿਸ ਨੇ ਮੇਰੇ ਨਾਲ ਹੋਣਾ ਸੀ

ਸਹੂਲਤਾਂ
ਮੁਹੱਬਤ ਤੋਂ ਵਧਕੇ ਨਹੀਂ ਹੋ ਸਕਦੀਆਂ

ਅੱਜ ਗੱਡੀ ਦੀ ਖਿੜਕੀ ਥਾਣੀਂ
ਬਾਹਰ ਹੀ ਵੇਖੀ ਜਾਣ ਨੂੰ ਜੀਅ ਕਰਦੈ
ਦੂਰ ਤੱਕ ਫੈਲੇ ਦਿਸਦੇ
ਹਰੇ ਭਰੇ ਖੇਤ ਮੈਦਾਨ ਚਰਾਗਾਹਾਂ
ਫਸਲਾਂ ਰੁੱਖ ਵੇਲਾਂ ਬੂਟੇ
ਸੰਤੁਸ਼ਟ ਤੇ ਪ੍ਰਸੰਨ ਚੰਗੇ ਲਗਦੇ

ਧਰਤੀ ਨਮੀ ਨਾਲ ਰੱਜੀ ਹੋਈ
ਜਿਵੇਂ ਆਤਮਾ ਰੱਜੀ ਹੁੰਦੀ
ਮੁਹੱਬਤ ਨਾਲ